კომუნიკაციების კომისიამ, ზუგდიდის ტექნოპარკში, სახელმწიფო ინტერნეტიზაციის თემაზე შეხვედრა გამართა.
შეხვედრას სამეგრელო-ზემო სვანეთის სახელმწიფო რწმუნებული დავით ვერავა, წალენჯიხის მუნიციპალიტეტის მერი გუბა საჯაია და რეგიონის მუნიციპალიტეტების მერები ესწრებოდნენ.
შეხვედრის მთავარი თემა ინტერნეტიზაციის სახელმწიფო პროგრამა იყო. კომუნიკაციების კომისიის თავმჯდომარემ მერებს, პროექტის ფარგლებში, რეგიონში ფართოზოლოვანი ინფრასტრუქტურის განვითარებისა და „ციფრული მხარდაჭერის პროგრამის“ შესახებ დეტალური ინფორმაცია მიაწოდა და უკვე არსებული შედეგები გააცნო.
„აღნიშნული პროექტის შედეგად, იმ დასახლებულ პუნქტებში, სადაც აქამდე მსგავსი მომსახურება არ ყოფილა, მოსახლეობისთვის ხელმისაწვდომი გახდება ისეთი სერვისები, როგორებიცაა ელექტრონული მმართველობა, ელექტრონული განათლება, ელექტრონული ჯანდაცვა, ელექტრონული კომერცია და სხვა თანამედროვე სერვისები,“ – განაცხადა გოგა გულორდავამ.
შეხვედრის ბოლოს, კომისიის თავმჯდომარე და მერები ერთობლივ თანამშრომლობაზე შეთანხმდნენ იმისთვის, რომ რეგიონის მოსახლეობის საჭიროებები მაქსიმალურად იყოს დაკმაყოფილებული.
