9 აპრილი – ტრაგედიისა და გამარჯვების დღე!
დღეს, 9 აპრილს, წალენჯიხის მუნიციპალიტეტში, ეროვნული ერთიანობის, სამოქალაქო თანხმობისა და სამშობლოსთვის დაღუპულთა მოგონების დღე აღინიშნა.
წალენჯიხის მუნიციპალიტეტის საკრებულოს თავმჯდომარემ ცოტნე შონიამ, თავმჯდომარის მოადგილეებმა, საკრებულოს წევრებმა, მარტვილი, აბაშა, წალენჯიხა და ჩხოროწყუს მაჟორიტარმა დეპუტატმა ილია ინჯიამ, წალენჯიხის მერმა გუბა საჯაიამ, ადგილობრივი თვითმმართველობის წარმომადგენლებმა და მოქალაქეებმა 1989 წლის 9 აპრილს დაღუპულთა ხსოვნას პატივი მიაგეს და ქ. წალენჯიხაში მდებარე 9 აპრილის სკვერი ყვავილებით შეამკეს.
ღონისძიებაზე სიტყვით გამოსვლისას საქართველოს პარლამენტის წევრმა – მარტვილი, აბაშა, წალენჯიხა და ჩხოროწყუს მაჟორიტარმა დეპუტატმა ილია ინჯიამ ხაზი გაუსვა 9 აპრილის განსაკუთრებულ მნიშვნელობას და აღნიშნა, რომ 1989 წლის 9 აპრილს დაღვრილი უდანაშაულო ადამიანების სისხლი იქცა ჩვენი ქვეყნის თავისუფლებისთვის ბრძოლის საფუძვლად, რომელმაც 1991 წლის 9 აპრილს საქართველოს დამოუკიდებლობის აღდგენით ჰპოვა თავისი ლოგიკური გაგრძელება.
1989 წლის 9 აპრილს საბჭოთა კავშირის სადამსჯელო სამხედრო ნაწილებმა მშვიდობიანი საპროტესტო აქცია დაარბიეს, რის შედეგადაც 21 ადამიანი დაიღუპა და ასობით დაშავდა.
1991 წლის 9 აპრილს კი მაშინდელმა უზენაესმა საბჭომ ეს თარიღი საქართველოს სახელმწიფოებრივი დამოუკიდებლობის აღდგენის დღედ გამოაცხადა.
1989 წლის 9 აპრილის ტრაგედიიდან 37 წელი შესრულდა..
