წალენჯიხის მუნიციპალიტეტის საკრებულოს სხდომათა დარბაზში გაიმართა საინფორმაციო შეხვედრა წვევამდელთა ეროვნულ სამხედრო სამსახურთან დაკავშირებულ ცვლილებებზე.
შეხვედრას ესწრებოდნენ წალენჯიხის მუნიციპალიტეტის საკრებულოს თავმჯდომარე ცოტნე შონია, მუნიციპალიტეტის მერი გუბა საჯაია, მერიისა და საკრებულოს წარმომადგენლები.
შეხვედრაზე წვევამდელთა ეროვნული სამხედრო სამსახურის ვადებსა და პირობებზე ისაუბრეს სამხედრო გაწვევისა და რეკრუტირების სამეგრელო–ზემო სვანეთისა და გურიის რეგიონული ცენტრის უფროსმა, ვიცე-პოლკოვნიკმა კახაბერ ინალიშვილმა, ცენტრის სერჟანტმა და მუნიციპალური განყოფილების ხელმძღვანელებმა.
კანონმდებლობის თანახმად, 2025 წლიდან წვევამდელთა შერჩევა ყოველწლიური შემთხვევითი შერჩევის პრინციპით ხორციელდება, ხოლო სამხედრო სამსახურის გავლა შესაძლებელია მხოლოდ საქართველოს თავდაცვის სამინისტროს სისტემაში.
წვევამდელთა ეროვნული სამხედრო სამსახურის პირობები განისაზღვრება შემდეგნაირად:
• საბრძოლო ქვედანაყოფში – 6 თვე, ანაზღაურება 765 ლარი;
• საბრძოლო მხარდაჭერისა და უზრუნველყოფის ქვედანაყოფში – 8 თვე, ანაზღაურება 635 ლარი;
• უმცროს სამეთაურო თანამდებობებზე და წინასწარ განსაზღვრული სპეციალობით სამსახური – 11 თვე, ანაზღაურება: სერჟანტებისთვის – 1275 ლარი, ოფიცრებისთვის – 1530 ლარი.
აღსანიშნავია, რომ საკუთარი სურვილით სამხედრო სამსახურში წასულ პირებს ანაზღაურება 30%-ით გაეზრდებათ.
შეხვედრა კითხვა-პასუხის რეჟიმში წარიმართა. შეხვედრის დასასრულს მუნიციპალიტეტის მერს სიმბოლური საჩუქარი გადაეცა.
